Daxili İşlər Nazirliyinin məlumatına görə, atasını amansızca öv tüfəngi ilə qətlə yetirən gənc oğlan saxlanılıb.

Aktual.ge xəbər verir ki, DİN Qoridə baş verən qanlı hadisə ilə bağlı açıqlama verib.

Bildirilib ki, oğul ov tüfəngi ilə atasını başından ölümcül yaralayıb, sonra isə cinayətin ört-basdır edilməsi üçün meyiti Tbilisidəki bağ evinə aparıb.

“İstintaqla müəyyən edilib ki, təqsirləndirilən şəxs Qori bələdiyyəsinin kəndlərindən birində ov tüfəngi ilə atası, 1956-cı il təvəllüdlü U.İ.-nin başından ölümcül xəsarətlər yetirib, bundan sonra cinayəti ört-basdır etmək məqsədilə meyiti Tbilisidəki bağ evinə aparıb. Həyata keçirilmiş istintaq-əməliyyat tədbirləri nəticəsində hüquq-mühafizə orqanlarının əməkdaşları tərəfindən təqsirləndirilən şəxs “isti izlər”lə yaxalanıb”, - deyə məlumatda bildirilib.

Ailə üzvünü qəsdən öldürmə faktı üzrə istintaq Gürcüstan Cinayət Məcəlləsinin 109-cu maddəsi ilə davam etdirilir.

Qeyd olunub ki, cinayəti törədən şəxsi 20 ilədək və ya ömürlük həbs cəzası gözləyir.