Marneulidə dünyaya gələn və Gürcüstanın işgüzar mühitində uğurla fəaliyyət göstərən Yaşar İbrahimov, Tbilisidəki "Caucasus University"nin Menecment üzrə doktor dərəcəsini alıb.

Aktual.ge məlumat verir ki, zəngin təhsil və iş təcrübəsi ilə tanınan Gürcüstan azərbaycanlısı Yaşar İbrahimov 1980-ci ilin martın 10-da Marneulidə anadan olub.

Yaşar İbrahimovun təhsil yolu olduqca müxtəlif və beynəlxalq xarakter daşıyır. 2021-2024-cü illərdə "Caucasus University" menecment üzrə doktor dərəcəsi alan Yaşar İbrahimov, daha əvvəl İspaniyanın Madrid şəhərində yerləşən IE Business Schoolda Executive MBA proqramını tamamlayıb. O, həmçinin London Metropolitan Universitetində Beynəlxalq Biznes üzrə magistr dərəcəsi və Qara Dəniz Beynəlxalq Universitetində Biznesin İdarəedilməsi üzrə bakalavr dərəcəsinə sahibdir.

Peşəkar karyerası boyunca İbrahimov, bir sıra beynəlxalq şirkətlərdə önəmli vəzifələrdə çalışıb. Hal-hazırda o, "Caucasus University"nin Biznes Məktəbində dəvət olunmuş müəllim kimi fəaliyyət göstərir. Bununla yanaşı, SOCAR Energy Georgia MMC və SOCAR Georgia Gas MMC şirkətlərində satınalma və nəqliyyat departamentlərində rəhbər vəzifələrdə 15 illik iş təcrübəsinə sahibdir.

İbrahimovun iş təcrübəsi təkcə Gürcüstanla məhdudlaşmır. O, Azərbaycanın Bakı şəhərində yerləşən West Consulting şirkətində və Türkiyənin Ankara şəhərində fəaliyyət göstərən Fetas Products və Supermarket Equipments Co Ltd şirkətlərində müxtəlif rəhbər vəzifələrdə çalışıb.

Sertifikatlar və nailiyyətlərlə dolu olan İbrahimovun karyerası, peşəkar inkişaf və menecment sahəsindəki uğurlu nümunələrdən biridir. O, Azərbaycan, türk, ingilis, rus, gürcü və ispan dillərini də bilir. 

Zəngin təhsil və iş təcrübəsinə malik Yaşar İbrahimov Gürcüstan azərbaycanlısı gənclərə təhsillə bağlı tövsiyyələr təklif edib:

"Sevgili gənclər,

Həyatım boyu öyrəndiyim ən vacib dərslərdən biri təhsilə sərmayə qoymağın əhəmiyyətidir. Təhsil insanı inkişaf etdirir, yeni üfüqlər açır və karyera yolunda sizi daha irəli aparır. Mənim karyeramda beynəlxalq təhsil almaq imkanım oldu, və bunu sizə də tövsiyə edirəm. Gürcüstanla məhdudlaşmayın, xarici universitetlərdə təhsil almağa cəhd edin, yeni biliklərə açıq olun. Amma xaricdə təhsili başa vurduqdan sonra vətənə qayıdıb xidmət etməyi unutmayın, çünki sizə burada çox ehtiyac var. 

Dilin gücü də inkaredilməzdir. Bir neçə dili sərbəst şəkildə bilmək, həm yerli, həm də beynəlxalq səviyyədə sizə böyük üstünlüklər verəcək. Ana dilinizlə yanaşı, gürcü, ingilis və rus dillərini öyrənin, çünki bu, sizə daha çox imkanlar qazandıracaq.  Həyatda uğur təsadüfən gəlmir. Qarşınıza böyük məqsədlər qoyun və onlara çatmaq üçün əzm və səbir göstərərək çalışın. Mənim uğurlarım, qarşıma qoyduğum hədəflərə doğru davamlı olaraq irəliləməyim sayəsində mümkün olub. Sizin də məqsədlərinizə çatacağınıza inanıram".