Sanksiyalara baxmayaraq, bahalı avtomobillər Rusiya Federasiyasına Gürcüstan vasitəsilə daxil olur. 

Aktual.ge xəbər verir ki, bu barədə Böyük Britaniyanın "Sky News" telekanalı araşdırma yayıb.

"Sky News"un məlumatına görə, onlar Gürcüstanda Böyük Britaniya və Avropa İttifaqının sanksiyaları ilə qadağan edilən avtomobillərin Rusiya Federasiyasına Gürcüstan vasitəsilə daxil olmasını təmin edən “çətin, lakin incə işlənmiş sxemi” aşkar ediblər.

İddiaya əsasən, müəyyən bir qrupun üzərinə Tbilisidəki salonlardan, Poti və ya Batumi limanlarından avtomobilləri Rusiya sərhədinə, yəni Lars keçid məntəqəsinə çatdırmaq öhdəliyi düşür.

“Avtomobillər sərhəd məntəqəsinə çatdırıldıqdan sonra, onlar bir neçə gün orada saxlanılır, uyğun sənədlərin hazırlanması gözlənilir. Sənədlərin də öz problemləri var: Avropa ölkələrinin Rusiya Federasiyasına qarşı sanksiyalar tətbiq etməsindən sonra, Gürcüstan da Rusiyaya avtomobil göndərilməsinə dair öz qadağalarını tətbiq etdi. Buna baxmayaraq, avtomobillərin sərhədi keçməsi üçün bir neçə üsul mövcuddur", - deyə reportajda qeyd olunub.

Beynəlxalq media olan "Sky News" avtomobillərin Rusiya Federasiyasına necə keçirildiyini təsvir edir:

"Yollardan biri avtomobillərin Ermənistanda qeydiyyatdan keçirilməsi və gömrükdən rəsmiləşdirilməsidir, burada onlara tranzit qeydiyyat nömrələri verilir və sonra Lars keçid məntəqəsinə gətirilir. Gürcüstan vətəndaşlarının Rusiya Federasiyasına vizasız keçə bilməsi (və əksinə) avtomobillərin sərhəddən keçirilməsini asanlaşdırır.

Bu üsulla avtomobili Rusiya Federasiyasına keçirən şəxsi konkret bir cinayət törətməkdə günahlandırmaq çətindir, lakin bütün sxem sanksiyalardan yan keçməyə xidmət edir. Həmçinin, bu üsulla Rusiyaya keçən avtomobillər gömrük məlumatlarında görünmür".

Qeyd olunub ki, BMW, Lexus, Mercedes, Range Rover, Porsche və Lamborghini kimi dəbdəbəli avtomobil modelləri Rusiyaya daxil olur.