Qəzzada bir ildir davam edən hücumlarını Livana daşımağa hazırlaşan İsrail quru əməliyyatına başlayıb.

Aktual.ge xəbər verir ki, bu barədə xarici KİV məlumat yayıb.

ABŞ Dövlət Departamenti İsrailin Livanda planlaşdırdığı bir sıra məhdud quru əməliyyatları barədə ABŞ-ı məlumatlandırdığını açıqlayıb.

İsrail mediası yazır ki, İsrail Livan sərhədindəki bir çox bölgəni hərbi zona elan edib. Digər tərəfdən, Livan mətbuatı "İsrail sərhəddə çox güclü artilleriya atəşi başlatdı" məlumatını elan edib.

İsrail günlərlə havadan hücum etdiyi Livanda quru əməliyyatına başlayıb. Bu gün müdafiə naziri Yoav Gallant "Müharibənin növbəti mərhələsi tezliklə başlayacaq" , - anonsunu verimişdi

“Al Arabiya” telekanalının verdiyi məlumata görə, İsrail ordusunun tankları axşam saatlarında Livanın cənubunda yerləşən Rmeyş yaşayış məntəqəsinə daxil olub.

Livanın MTV telekanalı məlumat yayıb ki, İsrail Livanın cənubunu tanklardan kütləvi atəşə tutmağa başlayıb.

Eyni məlumata görə, İsrailin zirehli texnikası artilleriya və aviasiyanın müşayəti altında Livan ərazisinə daxil olub. Hazırda İsrail istehkamçıları Livanın cənubunda maneələri aradan qaldırır və İsrail texnikasının sərhədyanı ərazilərə gətirilməsi davam edir.

Bildirilir ki, İsrailin ilk əsas hədəfi Livanın cənubunda 20 kilometrlik təhlükəsizlik zolağı yaratmaqdır.

Bundan əlavə, ABŞ-nin Yaxın Şərqdəki bütün hərbi bazaları yüksək hazırlıq vəziyyətinə gətirilib.

Hazırda bütün dünyanın gözü və qulağı Yaxın Şərqdədir. Beynəlxalq xəbər agentlikləri "Son dəqiqə" koduyla baş verənləri yayır.