"Gürcü Arzusu"nun siyasi şurası partiyanın yaradılmasının 13-cü ildönümü ilə əlaqədar bəyanat yayır.

Aktual.ge xəbər verir ki, bəyanatda qeyd olunub ki, 2012-ci il aprelin 21-də Bidzina İvanişvili siyasi birlik yaradıb və ən ağır dövrdə, özünün və ailəsinin həyatı bahasına, ölkədə qurulmuş qanlı diktaturaya qarşı qətiyyətli mübarizə elan edib.

Partiyanın bəyanatında vurğulanır ki, "rejimə qalib gəldikdən" sonra, “Gürcü Arzusu”nun hakimiyyəti dövründə Gürcüstan demokratiya və hüququn aliliyi prinsiplərinə, insanın əsas hüquq və azadlıqlarına möhkəm şəkildə əsaslanıb və geriyə dönüşü olmayan inkişaf yoluna qədəm qoyub.

Bəyanatda qeyd olunur ki, heç bir təhdid və şantaj, heç bir sanksiya və bəyanat “Gürcü Arzusu”nun hakimiyyətini Gürcüstanı müharibə alovuna salmağa məcbur edə bilməz.

“Gürcü Arzusu”nun siyasi şurası bəyanatını olduğu kimi təqdim edirik:

“Bu gün 'Gürcü Arzusu'nun yaradılmasından 13 il keçir. 2012-ci il aprelin 21-də Bidzina İvanişvili siyasi birlik yaratdı və ən ağır dövrdə, özünün və ailəsinin həyatı bahasına, ölkədə qurulmuş qanlı diktaturaya qarşı qətiyyətli mübarizə elan etdi. Rejimə qalib gəldikdən sonra, 'Gürcü Arzusu'nun dövründə Gürcüstan demokratiya və hüququn aliliyi prinsiplərinə, insan hüquq və azadlıqlarına əsaslandı və geriyə dönüşü olmayan inkişaf yoluna çıxdı.

'Gürcü Arzusu' hakimiyyəti, Gürcüstanın müstəqilliyini bərpa etdikdən sonra, ölkənin müharibə yaşamamış ilk hökumətidir. Üstəlik, fasiləsiz sülh 'Gürcü Arzusu' tərəfindən ən çətin geosiyasi şəraitdə qorunub. Bu baxımdan, xüsusilə son üç il çətin olub – Gürcüstanın ikinci cəbhəyə çevrilmə təhlükəsi vardı. Lakin ən ağır təzyiqlərə və şantaja baxmayaraq, hakimiyyət bu çağırışların öhdəsindən ləyaqətlə gəldi və gəlməkdə davam edir. Cəmiyyət görür ki, heç bir təhdid, şantaj, sanksiya və bəyanat 'Gürcü Arzusu'nu Gürcüstanı müharibəyə sürükləməyə vadar edə bilməz – bu isə ölkənin məhv olmasına gətirib çıxarardı.

2012-ci ildə, 9 illik ağır demokratik geriləmə dövrü, davamlı demokratik inkişafla əvəz olundu. 'Gürcü Arzusu'nun hakimiyyəti 2012-ci il 1 oktyabrda keçmişin avtoritar rejimini, qeyri-demokratik konstitusiyanı, saxtalaşdırılmış seçkiləri, işgəncə və qeyri-insani rəftarı, biznesə qarşı reketi, monopoliyalaşmış medianı, siyasi nəzarət altında olan məhkəməni və bir çox digər mənfi halları aradan qaldırdı. Bu gün Gürcüstanda insan hüquqları qorunur, ölkənin demokratik konstitusiyası var, ədalətli seçkilər keçirilir, işgəncə və qeyri-insani rəftar aradan qaldırılıb, biznes heç vaxt olmadığı qədər azaddır, məhkəmənin müstəqilliyi təmin olunub, mediada plüralizm mövcuddur.

Gürcüstan iqtisadi inkişafın düzgün yoluna qədəm qoydu. 2012-ci ildən sonra Gürcüstan iqtisadiyyatı iki qlobal və regional iqtisadi böhranla üzləşdi. Lakin real iqtisadi azadlıq, biznesin reketsiz fəaliyyəti və düzgün iqtisadi siyasət nəticəsində Gürcüstan bu çətinliklərin öhdəsindən uğurla gəldi və iqtisadiyyat üç dəfə artdı. Son 4 ildə ölkənin iqtisadiyyatı orta hesabla 9,7 faiz artıb ki, bu da regionda və Avropada ən yaxşı göstəricidir. Artıq bu il Gürcüstanın adambaşına düşən ÜDM-i 10 min dolları keçəcək, Beynəlxalq Valyuta Fondunun proqnozuna görə isə 2030-cu ildə bu rəqəm 13 500 dollara çatacaq və Gürcüstan yüksək gəlirli ölkələr sırasına daxil olacaq. Lari sabitdir, xarici borc 60%-dən 36,4%-ə düşüb. Dünya Bankının məlumatına görə, 2012-ci ildən sonra ölkədə yoxsulluq üç dəfə azalıb və 700 minə yaxın insan yoxsulluqdan çıxıb.

2012-ci ildən bəri dövlətin sosial siyasətə yanaşması kökündən dəyişdi. Ümumi səhiyyə proqramı tətbiq olundu, sosial cəhətdən zəif əhali üçün sosial yardımlar əhəmiyyətli dərəcədə genişləndirildi, yardımların siyasi maraqlara əsasən bölüşdürülməsi təcrübəsinə son qoyuldu.

Gürcüstan Avrointeqrasiya yolunda bütün əhəmiyyətli irəliləyişləri məhz 'Gürcü Arzusu'nun hakimiyyəti dövründə əldə edib. Məhz 2012-ci ildən sonra ölkə Assosiasiya Sazişi və azad ticarət razılaşması imzalayıb, vizasız rejim əldə edib. Gürcüstan namizəd statusunu da mübarizə ilə qazanıb – halbuki, bu statusı Gürcüstana qarşı şantaj vasitəsi kimi görənlər vardı. Avropa bürokratiyası hələ də Gürcüstanı şantaj etməyə və qeyri-demokratik qüvvələri hakimiyyətə qaytarmağa çalışır. Lakin biz vəd edirik ki, siyasi komandamız bütün çağırışların öhdəsindən ləyaqətlə gələcək və 2030-cu il üçün planlaşdırılmış Aİ genişlənməsinə Gürcüstan digər namizədlərdən daha yaxşı hazır olacaq. Ümid edirik ki, həmin vaxtadək Brüsseldəki indiki bürokratiya da ləyaqətli, müstəqil və Avropanın gələcəyinə yönəlmiş siyasi elita ilə əvəz olunacaq.

Bu gün Gürcüstan heç vaxt olmadığı qədər müstəqil və suveren bir dövlətdir. Hakimiyyət artıq heç kimdən göstəriş almır və ölkənin maraqlarına zidd addımlar atmağa məcbur edilə bilməz. “ 'Gürcü Arzusu'nun hakimiyyəti Gürcüstanın milli maraqlarından çıxış edir və bu maraqların əleyhinə heç vaxt kompromisə getməyəcək, gələcəkdə də vətəni, kilsəni və milli dəyərləri qətiyyətlə qoruyacaq!".