"Çox asandır agenti tanımaq, istəsən min dəfə rebrendinq et, istəsən 'Milli Hərəkat'da vəzifə tutmuş şəxsi siyahılara sal, istəsən başqa adamı siyahıya sal agent asanlıqla tanınır".

Aktual.ge xəbər verir ki, bunu Gürcüstanın Baş naziri İrakli Kobaxidze “İmedi” telekanalının efirində söyləyib.

Hökumət başçısının sözlərinə görə, yaxşı adamı agent kimi seçmək mümkün deyil, agent avtomatik olaraq o deməkdir ki, bu, yararsız insandır, öz ölkəsinin satqınıdır. 

“Reallıqda görünür ki, bu, kənardan idarə olunan prosesdir. Baxın, əvvəlki seçkilərdə 'dərin dövlətin' əsas məqsədi o idi ki, 'Milli Hərəkat' müxalifətdə ikinci yerə keçsin və biz də bu nəticəni gördük. Amma onlar həm də başa düşdülər ki, nə qədər ki, 'Milli Hərəkat'ın hakimiyyətlə birbaşa əlaqəsi olan şəxslər bizim opponentlərimizdir, bizə heç nə edə bilmirlər, qarışa bilmirlər.

İndi qərara aldılar ki, hakimiyyətlə birbaşa bağlı olan 'Milli Hərəkat', 'Axali' prosesdən kənarda qalsın və səhnədə elə adamlar qalsın ki, əvvəlki hakimiyyət dövründə rəsmi vəzifə tutmamış olsunlar. Bu, 'Lelo'dur, baxmayaraq ki, onlarda da bəzi Samadaşvili kimilər var. Xazaradze və Japaridze də, düzdür, əvvəlki hakimiyyətlə ağır sxemlərdə iştirak edirdilər, amma vəzifə tutmurdular. Burada isə Qaxaria var ki, o vaxt ümumiyyətlə Gürcüstanda yaşamırdı. Fikir belədir ki, guya bu yolla 'Milli Hərəkat'ın rebrendinqi daha asan olacaq. Amma bu da uğursuzluğa məhkumdur. Bu ssenari fonunda bizim reytinq 65 faizə çatdı.

Əsas problem nədir, çox asandır agenti tanımaq. İstəsən min dəfə rebrendinq et, istəsən 'Milli Hərəkat'da vəzifəli şəxsi siyahıya sal, istəsən başqa yerə qoy, agent asanlıqla tanınır. Cəmiyyət artıq agenturanı çox rahat tanıyır, adına nə qoyursan qoy, necə rebrendinq edirsən et, bu agentura elə asanlıqla üzə çıxır, ona görə də həmişə uduzurlar və gələcəkdə də uduzacaqlar. Onlar 2028-ci ildə də parlament seçkilərini uduzacaqlar, 2032-ci ildə də. Çünki agenti yaxşı adamdan seçmək olmaz.

Agent avtomatik olaraq yararsız insan, öz ölkəsinin satqını deməkdir. Buna görə də tamamilə məntiqli qapalı çevrə yaranır. Çünki sən hökmən agentlə bu ölkəni idarə etmək istəyirsənsə, siyasətçi kimi yalnız təhrif olunmuş düşüncəyə malik insanları seçməli olursan. Necə ki, Xazaradze, Qaxaria, Saakaşvili, Qvaramiya, Japaridze, Melia və başqaları. Bu, məntiqli zəncirdir: çünki əgər hakimiyyətə agent gətirmək istəyirsənsə, agent kimi vicdanlı və sağlam düşüncəli adam seçmək mümkün deyil. Buna görə də onlara məhz qüsurlu düşüncə sahiblərini seçmək qalır”, - deyə İrakli Kobaxidze qeyd edib.