Daxili İşlər Nazirliyi (DİN) “Dəyişiklik üçün Koalisiya”nın liderlərindən biri Elene Xoştarianın saxlanılması ilə bağlı bəyanat verib.

Aktual.ge xəbər verir ki, DİN müxalif liderin saxlanılmasını “Gürcü Arzusu – Demokratik Gürcüstan” partiyasının Tbilisi merliyinə namizədi Kaxa Kaladzeyə aid seçki bannerlərinin zədələnməsi faktı ilə əlaqələndirib.

“Daxili İşlər Nazirliyinin əməkdaşları əmlaka zərər vurmaq ittihamı ilə 1979-cu il təvəllüdlü Elene Xoştarianı saxlayıblar.

İstintaq materiallarına əsasən, təqsirləndirilən şəxs cari ilin 14 sentyabrında Tbilisidə, Melikişvili prospektində ‘Gürcü Arzusu – Demokratik Gürcüstan’ partiyasının Tbilisi merliyinə namizədinin seçki bannerlərinə zərər vurub.

İstintaq Cinayət Məcəlləsinin 187-ci maddəsi ilə aparılır ki, bu da əmlakın zədələnməsini və ya məhv edilməsini nəzərdə tutur.

Cinayət 5 ilədək azadlıqdan məhrumetmə cəzasını nəzərdə tutur”, - DİN-in bəyanatında deyilir.