Texniki baxış mərkəzləri üçün yeni qaydalar qüvvəyə minib.

Aktual.ge xəbər verir ki, bu barədə hökumət müvafiq qərar qəbul edib.

Söhbət dövri texniki baxış mərkəzlərinin binaları, avadanlıqları və personalın texniki ixtisası ilə bağlı tələblərdən gedir.

Qərara əsasən, baxış mərkəzləri mütləq şəkildə Yerüstü Nəqliyyat Agentliyinin tələb etdiyi formada vahid elektron bazaya qoşulmalı və müvafiq məlumatı elektron şəkildə təqdim etməlidirlər.

Bundan əlavə, baxış mərkəzləri aşağıdakı informasiya-texnologiya tələblərinə cavab verməlidirlər:

- Hər bir mərkəz fasiləsiz telefon və internet bağlantısı ilə təmin olunmalıdır;

- Mərkəzdə müvafiq kompüter/elektron avadanlıqlar olmalıdır ki, bu da baxış prosesinin effektivliyini, dəqiqliyini və etibarlılığını təmin etsin;

- Baxış nəticələrinin saxlanılması həmin nəqliyyat vasitəsinin texniki baxış dövrü müddətinə uyğun olaraq mərkəzin öz elektron bazasında aparılmalıdır;

- Hər bir mərkəz nəqliyyat vasitələrinin baxışının idarə edilməsi informasiya sisteminə qoşulmalıdır.

Sistem ən azı aşağıdakı imkanları təmin etməlidir: 

- Vətəndaşın nəqliyyat vasitəsini baxış üçün gətirməsi məqsədilə mərkəzə onlayn müraciət və vaxt təyin etməsi;

- Baxış nəticələrinin dəqiq qeydiyyatı, saxlanması və ötürülməsinin qorunması və etibarlılığı; avtomobilin çəkidən, əyləc testindən, qaz analizatorundan və tüstüölçəndən əldə edilən nəticələrin avtomatik şəkildə mərkəzi serverə ötürülməsi, inspektorun və ya mərkəzin müdaxiləsi olmadan;

- Dövlət nömrə nişanı daxil etməklə avtomobilin baxış statusu və nəticələri barədə məlumatın əldə olunması;

- Nəqliyyat vasitələrinin kateqoriyası, vaxt intervalı və konkret mərkəz üzrə statistik məlumatlar;

- Mərkəzin informasiya sistemi vasitəsilə xidmət agentliyindən nəqliyyat vasitəsinin qeydiyyat məlumatlarını sorğu edə bilməsi;

- Baxış sisteminə daxil edilən bütün məlumatlara (istifadəçinin şəxsi məlumatları istisna olmaqla) Daxili İşlər Nazirliyinin Patrul Polisi Departamenti, Xidmət Agentliyi, Akkreditasiya Mərkəzi və Yerüstü Nəqliyyat Agentliyi öz səlahiyyətləri çərçivəsində fərdi çıxış imkanı əldə etməlidir.

Bundan əlavə, qərara əsasən, baxış mərkəzlərində test zonalarında video-müşahidə sistemləri quraşdırılmalıdır. Bu sistemlər ən azı 2 kamera olmaqla aşağıdakı tələblərə cavab verməlidir:

- Baxış zamanı hər bir nəqliyyat vasitəsinin ön və arxa dövlət nömrə nişanları aydın görünməlidir;

- Kadrlarda avtomobilin bütün baxış prosesi əks olunmalıdır;

- Kamera sayı və bucaqları hər bir avtomobilin və onun ətrafının tam görünməsini təmin etməli, hər bir test xəttində dörd tərəfdən videomüşahidə mümkün olmalıdır;

- Videoyazı fasiləsiz, 24/7 aparılmalı və çəkilən materiallar ən azı 14 ay saxlanılmalıdır.

Qərara görə, bu videomüşahidə sistemindən Daxili İşlər Nazirliyinin səlahiyyətli şəxsləri istifadə edə biləcəklər.

Bundan başqa, Yerüstü Nəqliyyat Agentliyi 2026-cı ilin 31 dekabrınadək yeni vahid elektron bazanın yaradılmasını və onun fasiləsiz idarə olunmasını təmin etməlidir.