Gürcüstan hökuməti Kutaisi və Rustavidə müasir standartlara uyğun universitet şəhərciklərinin tikilməsi barədə qərar qəbul edib.

Aktual.ge xəbər verir ki, bu barədə məlumatı İnfrastruktur Nazirliyi yayıb.

Məlumatda qeyd olunub ki, universitet şəhərciklərinin tikintisi üçün lazım olan tədbirlərin həyata keçirilməsi Gürcüstanın Bələdiyyə İnkişaf Fonduna tapşırılıb.

“Hökumətin tapşırığına uyğun olaraq, Kutaisi və Rustavidə universitet şəhərciklərinin tikintisi üçün Fond detallı layihə-smeta sənədlərinin hazırlanmasına, tikinti işləri və nəzarət xidmətlərinin satın alınması prosesinə başlayacaq ki, bu da hər iki ərazidə tamhüquqlu universitet infrastrukturunun yaradılmasını nəzərdə tutur.

Layihənin həyata keçirilməsi nəticəsində ölkədə müasir, regional şəkildə paylanmış universitet sistemi yaradılacaq. Bu sistem tələbələrə beynəlxalq standartlara uyğun təhsil, tədqiqat imkanları və tamhüquqlu tələbə həyatı təmin edəcək. Yeni universitet kampusları Kutaisidə əlavə 20 min tələbəyə xidmət göstərəcək, Rustavi isə 40 min tələbə qəbul edə biləcək.

Layihə ilə nəzərdə tutulan tədbirlərin təxmini dəyəri 800 milyon lari, universitet şəhərciklərinin ərazisinə düşən daşınmaz əmlakın qiymətləndirilməsi və satın alınmasının təxmini dəyəri isə 210 milyon laridir.

İnfrastruktur işləri, layihələndirmə, tikinti və nəzarət daxil olmaqla 2026–2032-ci illərdə həyata keçiriləcək.

Müasir universitet şəhərcikləri on minlərlə tələbə üçün yeni, keyfiyyətli məkanlar yaradacaq və regionların inkişaf potensialını artıracaq”, - deyə məlumatda bildirilir.