Toksikoloq Temur Kobidze bildirib ki, həm 2024-cü ildə, həm də cari il ərzində göz yaşardıcı və qıcıqlandırıcı qazla zəhərlənmə səbəbindən Gürcüstanda heç bir xəstə stasionara yerləşdirilməyib.

O, bu açıqlamanı BBC-nin hazırladığı araşdırma materialı ilə əlaqədar “Mtavari”-də verib. Kobidzenin sözlərinə görə, noyabr hadisələrindən sonra insanlar əsasən fiziki zədələnmələr səbəbi ilə tibbi müəssisələrə müraciət ediblər.

“Rəsmi olaraq bildiririk ki, həm keçən il, həm də bu il Toksikoloqlar Assosiasiyasına, qeyri-hökumət təşkilatlarına və ya xarici həmkarlarımıza heç kim müraciət etməyib. Gürcüstan xəstəxanalarına müraciət olsa da, bu, əsasən fiziki zədələnmələrə görə olub. Göz yaşardıcı və qıcıqlandırıcı qazla bağlı stasionara müraciət edən olmayıb. Xəstə zəhərlənmişsə, adətən dərhal həkimə müraciət edir. Belə hallar Gürcüstan stasionarlarında qeydə alınmayıb. Mən də belə bir hal görməmişəm və bildiyimə görə, digərləri də görməyib. Statistik məlumatlar mövcuddur və stasionarlara müraciətlərin sayı xəstəliyin tarixi əsasında qeyd olunur”, – deyə Kobidze vurğulayıb.

Xatırladaq ki, BBC-nin məlumatına görə, onların topladığı sübutlar göstərir ki, keçən il Gürcüstan hakimiyyəti hökumət əleyhinə etiraz aksiyalarını yatırmaq üçün Birinci Dünya Müharibəsi dövrünə aid kimyəvi silah istifadə edib. BBC yazır ki, “Gürcüstan hökumətinin Avropa İttifaqına üzvlük prosesini dayandırmağa çalışan etirazçılar müxtəlif simptomlardan şikayət edirdilər – gözlərin yanması, öskürək, qusma – və bu simptomlar həftələrlə davam edirdi.” BBC bildirir ki, onlar World Service ilə kimyəvi silah ekspertləri, Gürcüstan xüsusi təyinatlı qüvvələrinin nümayəndələri və həkimlərlə müsahibə aparıblar və sübutlar Fransız hərbi qüvvələrinin “Camite” adlandırdığı agentin istifadə olunduğunu göstərir.

Məlumata görə, Dövlət Təhlükəsizlik Xidməti BBC tərəfindən açıq məkanlarda yayılan cinayət məlumatı ilə bağlı istintaqa başlayıb.

Xüsusilə, istintaq Cinayət Məcəlləsinin 333-cü maddəsi (vəzifə səlahiyyətlərinin aşılması) və 319-cu maddəsi (xarici təşkilata düşmənçilik fəaliyyətdə yardım) üzrə aparılır.