Gürcüstan Dövlət Təhlükəsizliyi Xidmətinin (DTX) rəis müavini Laşa Mağradzenin açıqlamasına görə, BBC-nin süjetində aksiyaçılara qarşı “Kamit” adlı maddənin istifadəsi barədə səsləndirilən məlumatlar tamamilə uydurma və məqsədyönlü dezinformasiyadır.

Aktual.ge xəbər verir ki, o, DTX-da keçirilən brifinqdə belə deyib.

Onun sözlərinə görə, aparılan istintaq çərçivəsində qurum üçün maraqlı şəxslərdən yalnız biri – DİN-in keçmiş əməkdaşı Laşa Shergelaşvilinin dindirilməsi mümkün olmayıb. O, başqa bir cinayət işi üzrə axtarışdadır.

“İstintaq üçün maraqlı şəxslərdən yalnız bir şahidin, Laşa Shergelaşvilinin dindirilməsi mümkün olmadı. BBC-nin hazırladığı film müəllifinin fikirləri də əsasən onun məlumatlarına söykənirdi.

Diqqətəlayiq məqam odur ki, həmin şəxslə bağlı Dövlət Təhlükəsizliyi Xidmətində yaxın keçmişdə baş vermiş rezonanslı cinayət işi üzrə operativ-axtarış və istintaq hərəkətləri aparılır. Bu iş, təqsirləndirilən Beka Çuluxadzenin odlu silahlar və döyüş sursatları, o cümlədən tritol partlayıcı maddəsi almaq və saxlamaq faktına aid idi.

Cəmiyyəti xatırladırıq ki, həmin iş üzrə operativ və istintaq tədbirləri cari ilin 4 oktyabrında baş verən məlum hadisələrlə paralel aparılırdı.

İstintaq intensiv şəkildə o versiya üzərində işləyir ki, Ukraynanın xüsusi xidmət orqanlarında müqavilə ilə çalışan Laşa Shergelaşvili 4 oktyabrdan bir neçə gün əvvəl Beka Çuluxadzedən qeyd edilən döyüş sursatlarını, partlayıcı maddələri və qurğuları əldə edib Tbilisiyə yaxın ərazidə gizlətməyi sifariş edib. Shergelaşvili hazırda Ukraynadadır.

Beləliklə, istintaqın topladığı danılmaz sübutlar bizə nəticə çıxarmağa əsas verir ki, BBC-nin filmində Gürcüstanda guya 'Kamit' adlı kimyəvi silahın aksiyaçılara qarşı tətbiqi barədə yayılan məlumat tamamilə uydurma və məqsədyönlü dezinformasiyadır. Bu, Gürcüstanın maraqlarına zərər vurmağa xidmət edir və təəssüf ki, buna Gürcüstan vətəndaşları da BBC filminin müəllifləri ilə birlikdə qoşulublar. Onların fəaliyyəti ölkəmizə qarşı konkret düşmən məqsədləri həyata keçirmək üçün yaxşı planlaşdırılmış, təşkil olunmuş və kampaniya xarakteri daşıyır.

Buna görə də, araşdırılmalı iki istiqamətdən biri – polis tərəfindən guya ötən əsrin 30-cu illərində qadağan edilmiş 'Kamit' adlı maddənin istifadə olunması barədə uydurma faktla bağlı istintaq hərəkətləri başa çatdırıldığından, Dövlət Təhlükəsizliyi Xidməti istintaqı Gürcüstan Cinayət Məcəlləsinin 319-cu maddəsi ilə nəzərdə tutulan, xarici təşkilat üçün düşmən fəaliyyətində iştirak etməkdə köməklik göstərmək ehtimalı üzrə davam etdirir.

Her bir özünə hörmət edən dövlətin təhlükəsizliyinə cavabdeh qurum kimi, Gürcüstan Dövlət Təhlükəsizliyi Xidməti gələcəkdə də siyasi sabitlik və təhlükəsizlik məsələlərinə xüsusi diqqət yetirəcək. Bu məsələlər ölkəmizin təhlükəsizlik sahəsində əsas çağırışlarından biridir”, - deyə Laşa Mağradze bildirib.