Kvemo Kartli polis əməkdaşları böyük miqdarda narkotik vasitələrin əldə edilməsi və saxlanması ilə bağlı əməliyyat həyata keçirib.

Aktual.ge xəbər verir ki, Daxili İşlər Nazirliyinin Kvemo Kartli Polis Departamentinin əməkdaşları, xüsusilə böyük miqdarda narkotik vasitələrin əldə edilməsi və saxlanması ittihamı ilə 1982-ci il təvəllüdlü B.N. və 1979-cu il təvəllüdlü Z.C.-ni Gardabani və Tetritskaro bələdiyyələrində müxtəlif vaxtlarda saxlayıblar.

Hüquq-mühafizə orqanları saxlanılan şəxslərin şəxsi əşyaları və yaşayış yerlərində apardıqları axtarış zamanı “metadon”, “marixuana” və “kenevir bitkisi” də daxil olmaqla narkotik vasitələri maddi sübut kimi götürüblər.

Fakt üzrə Cinayət Məcəlləsinin 260-cı maddəsinin III hissəsinin “a” bəndi ilə istintaq aparılır ki, bu da 20 ilədək azadlıqdan məhrumetmə cəzasını nəzərdə tutur.