Parlamentin vitse-spikeri Nino Tsilosani plenar iclasda çıxışı zamanı bildirib ki, ölkə xaricindən zorla sırınan qütbləşmə və radikal siyasi gündəliyin formalaşdırılması, cəmiyyətin bölünməsi və süni qarşıdurmanın yaradılması üçün ən əsas vasitələrdən biri sağlam debatların və qarşı-qarşıya duran tərəflər arasında açıq müzakirələrin boğulması olub.

Tsilosaninin sözlərinə görə, debatların mövcudluğu müxalifət üçün dağıdıcı nəticələr doğurduğundan, onları himayə edən qüvvələr cəmiyyətin fərqli mövqeləri sağlam formatda dinləmək imkanını əlindən almağa qərar veriblər.

Vitse-spiker qeyd edib ki, bu məsələ ilə bağlı bir neçə gün əvvəl Gürcüstanın baş naziri İrakli Kobaxidze geniş bəyanatla çıxış edərək təşəbbüsün kim tərəfindən irəli sürüldüyünü, necə icra edildiyini və məqsədinin nə olduğunu ətraflı izah edib. Onun sözlərinə görə, xarici qüvvələrə tabe olan bəzi subyektlər bu planı yalnız qismən həyata keçirə biliblər.

Tsilosani vurğulayıb ki, media məkanında təhqir, böhtan və yalanın “standart”a çevrilməsi, fərqli fikirlərin susdurulması, diskussiya və psevdoliberal ideologiyanın ifşası üçün məkanın aradan qaldırılması eyni məqsədə xidmət edib. Onun fikrincə, debatlar zamanı cəmiyyətin yalanla həqiqəti asanlıqla ayırd etmək imkanı yaranır ki, bu da xarici sifarişlərin icraçısı olan radikal müxalifət üçün təhlükəlidir.

Nino Tsilosani bildirib ki, məhz buna görə də həmin qüvvələr ictimaiyyəti sağlam debat formatında fərqli mövqeləri dinləmək və məlumatlı qərar vermək imkanından məhrum etməyə çalışıblar. Onun sözlərinə görə, bu vəziyyət mütləq dəyişdirilməlidir, çünki gürcü xalqı gələcəkdə istənilən seçimi müxtəlif mövqelərin qiymətləndirilməsi və təhlili əsasında etməlidir.