Gürcüstanda Türkiyə Respublikasının 14 vətəndaşı saxlanılıb, onlardan 11 nəfəri son 5 il ərzində Türkiyə polisi tərəfindən beynəlxalq səviyyədə verilmiş İnterpolun qırmızı bildirişləri əsasında axtarışda olub, 3 nəfər isə Türkiyənin hüquq-mühafizə orqanları tərəfindən milli səviyyədə axtarışda idi.

Aktual.ge xəbər verir ki, bu barədə Daxili İşlər Nazirliyində keçirilən brifinqdə Mərkəzi Kriminal Polis Departamentinin direktor müavini İrakli Dondoladze bildirib.

Onun sözlərinə görə, saxlanılan şəxslərlə bağlı qanunla nəzərdə tutulmuş hüquqi prosedurlar həyata keçirilir ki, onların Türkiyə Respublikasının ədalət mühakiməsinə təhvil verilməsi təmin edilsin.

“Daxili İşlər Nazirliyinin əməkdaşları Gürcüstan ərazisində olan və müxtəlif ölkələr tərəfindən axtarılan xarici vətəndaşların aşkarlanması və saxlanılması məqsədilə tərəfdaş dövlətlərin hüquq-mühafizə orqanları ilə aktiv əməkdaşlıq edirlər.

Son 24 saat ərzində Daxili İşlər Nazirliyinin əməkdaşları türkiyəli həmkarları ilə birlikdə Gürcüstanın müxtəlif bölgələrində növbəti uğurlu polis əməliyyatı keçiriblər – Türkiyə Respublikasının 14 vətəndaşı saxlanılıb. Onlardan 11 nəfər Türkiyə polisi tərəfindən beynəlxalq səviyyədə son 5 il ərzində verilmiş İnterpolun qırmızı bildirişi əsasında axtarışda olub, 3 nəfər isə Türkiyə hüquq-mühafizə orqanları tərəfindən milli səviyyədə axtarılırdı.

Hüquq-mühafizə orqanlarının apardığı istintaq göstərir ki, saxlanılan şəxslərin əksəriyyəti Gürcüstan ərazisinə onlar haqqında beynəlxalq axtarış elan edilməzdən əvvəl daxil olub, bir qismi isə Gürcüstana qanunsuz daxil olub və bununla bağlı müvafiq cinayət-prosessual tədbirlər davam etdirilir.

Saxlanılanlar arasında ağır və xüsusilə ağır cinayətlərdə ittiham olunan şəxslər var. Onlar arasında narkotik və psixotrop maddələrin istehsalı, satışı, əldə edilməsi və saxlanması, oğurluq, qəsdən bədən xəsarəti yetirmə, hədələmə, odlu silahın qanunsuz əldə edilməsi, saxlanması və daşınması, başqasının əmlakına ziyan vurma, yetkinlik yaşına çatmayan şəxsə qarşı əxlaqsız hərəkətlər, cəza çəkməkdən yayınma, kriminal təşkilat üzvlüyü, qətl və dələduzluğun 26 epizodunda ittiham olunan axtarışda olan şəxslər var.

Saxlanılan şəxslərlə bağlı qanunla nəzərdə tutulmuş prosedurlar həyata keçirilir ki, onların Türkiyə Respublikasının ədalət mühakiməsinə təhvil verilməsi təmin olunsun.

Bu şəxslərin yerinin müəyyən edilməsi və saxlanılması uzunmüddətli operativ və axtarış tədbirlərindən sonra mümkün olub. Əməliyyatın planlaşdırılması və həyata keçirilməsində Daxili İşlər Nazirliyinin müxtəlif bölmələri və Gürcüstan Baş Prokurorluğunun əməkdaşları ilə yanaşı, Türkiyə Respublikasının İnterpol Milli Bürosu, Türkiyə Milli Polisində təşkil olunmuş cinayətkarlıqla mübarizə bölmələri, həmçinin Gürcüstanda akkreditə olunmuş Türkiyə polis və jandarma attaşeləri iştirak ediblər.

Eyni zamanda, bu gün Gürcüstanda olan türkiyəli həmkarlarımıza xüsusi təşəkkürümüzü bildirmək istəyirik. Gürcüstan və Türkiyə arasında hüquq-mühafizə sahəsində mövcud olan sıx və uzunmüddətli əməkdaşlıq bizə təşkil olunmuş cinayətkarlığa qarşı effektiv mübarizə aparmağa və birlikdə konkret nəticələr əldə etməyə imkan verir.

Qeyd etmək lazımdır ki, bu, Gürcüstan və Türkiyənin hüquq-mühafizə orqanlarının əməkdaşları tərəfindən birgə həyata keçirilmiş daha bir uğurlu polis əməliyyatıdır. İki ölkənin hüquq-mühafizə orqanları keçən ilin avqust ayında da birgə əməliyyat keçirərək Türkiyə polisi tərəfindən beynəlxalq axtarışda olan 14 nəfəri saxlamışdılar”, – deyə bəyanatda qeyd olunub.