“İkinci gündür ki, Konstitusiya Məhkəməsində hər bir partiyanın nümayəndəsi iddiaçı tərəfdən onların qadağan edilməsi üçün təqdim olunan iddiada hansı arqument və sübutların olduğunu izah etməsini tələb edir, lakin məhkəmənin plenumunda bu vəsatət təmin olunmur”.

Aktual.ge xəbər verir ki, bunu müxalifət partiyalarının konstitusiyaya zidd hesab edilməsi ilə bağlı Konstitusiya Məhkəməsinin bugünkü iclası başa çatdıqdan sonra “Güclü Gürcüstan – Lelo”nun liderlərindən biri Badri Caparidze deyib.

Onun sözlərinə görə, hər bir partiyaya “Gürcü Arzusu”nun onlara qarşı hansı ittihamları irəli sürdüyü izah edilməlidir.

“İkinci gün başa çatır və biz hamımız davamlı, israrla tələb edirik ki, bizə desinlər və hər bir partiyanı nədə ittiham etdiklərini izah etsinlər. Söhbət 23-cü maddənin pozulmasından gedir. Lakin həmin maddədə sadalananların heç birinin onun pozulması ilə əlaqəsi yoxdur, 23-cü maddədə etnik ədavətin qızışdırılmasından söhbət gedir. Lelo bunu edib? Xeyr, biz sizə bununla bağlı irad bildirmirik, deyirlər. İddiaçı bunu konkretləşdirməlidir və biz məhkəmədən də bunu konkretləşdirməsini xahiş edirik. Təəssüf ki, bu vəsatətlər təmin olunmur”, – deyə Badri Caparidze qeyd edib.

“Gürcü Arzusu” tərəfindən Konstitusiya Məhkəməsinə təqdim olunan iddianı parlamentin 88 deputatı imzalayıb.

İddia əsasında məhkəmənin gündəliyində aşağıdakı siyasi birliklərin konstitusiyaya zidd hesab edilməsi məsələsi dayanır:

• “Birlik – Milli Hərəkat”

 • “Dəyişikliklər üçün Koalisiya – Qvaramiya, Meliya, Girçi, Droa”

 • “Güclü Gürcüstan – Lelo, Xalq üçün, Azadlıq üçün!”

 • “Federalistlər Partiyası”

 • “Qaxariya – Gürcüstan üçün” partiyası