"Gürcü və rus xalqları bir-birlərinə həsrət qalıblar". 

Aktual.ge xəbər verir ki, bunu Rusiyanın Xarici İşlər Nazirliyinin sözçüsü Mariya Zaxarova Yekaterinburqda keçirilən Beynəlxalq Gənclər Festivalında Rusiya mediasına müsahibəsində deyib.

“Düşünürəm ki, Gürcüstan nümayəndə heyətini bu platformada ilk dəfə görmürsünüz. Bəli, bizim rəsmi diplomatik münasibətlərimiz yoxdur, lakin eyni zamanda, ticarət, iqtisadi və humanitar sahələr fəal şəkildə inkişaf edir. Və nəhayət, bu halda 'aleluya' sözündən istifadə edəcəyəm, çünki bu, uzun müddət idi ki, gözlənilirdi - viza məhdudiyyətləri aradan qaldırıldı. Əvvəllər Gürcüstandan bu foruma yalnız ayrı-ayrı qrupların və nümayəndə heyətlərinin gəlməsi mümkün idisə, indi həmin ölkənin hər bir vətəndaşı bunu edə bilər. Biz hamınızı gözləyirik. Biz bir-birimiz üçün darıxmışıq”, - deyə o qeyd edib.

Onun sözlərinə görə, “Gürcüstanda Rusiya vətəndaşları üçün açıq olan turizm marşrutları inkişaf edir” və o, festival çərçivəsində Gürcüstan nümayəndə heyəti ilə söhbət etdiyini qeyd edib.

“Orada bizim vətəndaşlarımızı necə qarşılayırlar, onlara necə yaxşı xidmət göstərirlər. Eyni şeyi Rusiya haqqında da deyə bilərəm. Turist axınlarını gözləyirik. Biz bizim yanımıza sülh məqsədilə gələnlər üçün heç vaxt maneələr yaratmamışıq. Bunlar qeyri-dost rejimə malik ölkələrin nümayəndələri də ola bilərdi, bizim müttəfiqimiz olan ölkələrin nümayəndələri də. Heç vaxt ayrı-seçkilik olmayıb”, - deyə Mariya Zaxarova vurğulayıb.