Cenomi Georgia, yəni “Retail Group Georgia” MMC 2025-ci il üzrə maliyyə hesabatını açıqlayıb. Hesabata əsasən, şirkətin il ərzində ümumi satışları 77 milyon lari artaraq 434 milyon lariyə çatıb. Şirkətin xalis mənfəəti isə demək olar ki, dəyişməyərək 49 milyon lari təşkil edib.

Aktual.ge xəbər verir ki, Cenomi şirkəti Gürcüstanda Inditex qrupuna daxil olan Zara, Bershka, Massimo Dutti, Pull & Bear, həmçinin Mango, Marks & Spencer, Stradivarius və Oysho brendlərinin rəsmi nümayəndəsidir. Şirkət Səudiyyə Ərəbistanının ən böyük pərakəndə satış qruplarından biri tərəfindən təsis edilib və Yaxın Şərq və Mərkəzi Asiya regionlarında qlobal brendlərin pərakəndə satışını həyata keçirir.

Qrupun tərkibindəki şirkətlərin maliyyə hesabatlarına əsasən, satışlarda ilk sırada Zara qərarlaşıb. Brend Gürcüstan üzrə beş mağaza və elektron ticarət platforması ilə təmsil olunur. Zara-nın ölkədəki ən böyük, 2 833 kvadratmetr sahəyə malik mağazası “City Mall”da yerləşir. 2025-ci ildə Gürcüstanda Zara-nın satışları 29 faiz artaraq 212 milyon lariyə çatıb.

Qrupun tərkibindəki brendlərin 2025-ci il üzrə satış həcmi belə olub:

• Zara – 212,4 milyon lari;

• Massimo Dutti – 59 milyon lari;

• Mango, Parfois, Aldo, Flormar, US Polo – 57,1 milyon lari;

• Stradivarius – 34,3 milyon lari;

• Bershka – 25,2 milyon lari;

• Pull & Bear – 20 milyon lari;

• Marks & Spencer – 4 milyon lari;

• Zara Home – 3,9 milyon lari.

Şirkətin hesabatında bildirilir ki, 2025-ci maliyyə ili Cenomi Retail Georgia üçün tarixində ən yüksək göstəricilərlə başa çatıb. Konsolidə edilmiş satışlar 434 milyon lari, EBITDA göstəricisi 68 milyon laridən, xalis mənfəət isə 49 milyon laridən çox olub.

Şirkətin məlumatına görə, məhsuldarlıq göstəriciləri də əhəmiyyətli dərəcədə yaxşılaşıb. Bir kvadratmetr üzrə satış həcmi 2019-cu ildəki 4 300 laridən 2025-ci ildə 15 300 lariyə yüksəlib. Hesabatda bunun əməliyyat səmərəliliyində struktur artımı göstərdiyi qeyd olunur.

Hesabatda həmçinin bildirilir ki, kirayə və əməkhaqqı xərclərinin satışlardakı payı ümumi xərclərin artmasına baxmayaraq, hədəf göstəricidən aşağı səviyyədə qalıb. Şirkət bunu biznesin miqyasının genişlənməsi və nəticələrdən asılı əməkhaqqı sisteminin tətbiqi ilə əlaqələndirib.

“Brendlərin qlobal səviyyədə nəticələri yüksək olub. Mango, Oysho və KIKO Milano beynəlxalq reytinqlərdə, o cümlədən Avropada bir kvadratmetr üzrə satış göstəricilərinə görə lider mövqelərdə yer alıblar. Əsas brendlərin mağazalarının reytinq göstəricilərinin yüksəlməsi çeşidin genişləndirilməsinə və məhsul təchizatı standartlarının yaxşılaşdırılmasına imkan verib”, – deyə şirkətin hesabatında bildirilib.

Cenomi şirkəti Səudiyyə Ərəbistanından olan milyarder Fəvaz Əl-Koxair tərəfindən təsis edilib. Forbes-un məlumatına görə, 2017-ci ildə Əl-Koxairin sərvəti 1,2 milyard dollar qiymətləndirilib. Lakin nəşr həmin vaxtdan etibarən onun sərvətinin qiymətləndirilməsini yeniləməyib.

mənbə: Bm.ge