“Birbaşa təzyiq var idi ki, Saakaşvili ölür, əgər onu Avropa İttifaqının nümayəndələrinə təhvil verməsəydik, bir neçə günə öləcəkdi. Gördük ki, nəinki ona bir şey oldu, bundan sonra övladı dünyaya gəldi və məhkəmə proseslərini izləyən hər kəs onun çox sağlam göründüyünü də görür. Diktatoru, öz agentlərini həbsxanadan azad etmək kampaniyasının bir hissəsidir. Bu tapşırıq indi Eka Qiqauriyə verilib”.

Aktual.ge xəbər verir ki, Parlamentin sədri Şalva Papuaşvili “Beynəlxalq Şəffaflıq – Gürcüstan” (Transparency International - TI) təşkilatının Mixeil Saakaşvilinin “siyasi məhbuslar siyahısına daxil edilməsi” ilə bağlı bəyanatını belə şərh edib.

Parlamentin sədri hesab edir ki, Saakaşvilinin bu siyahıya daxil edilməsi onun həbsdən azad edilməsinə xidmət edir. 

“Bu siyahını hazırlayan Eka Qiqauriyə bu tarixçədə 17-ci dərəcəli fiqurdur. Əsas məsələ kimin maliyyələşdirməsidir, maliyyəçini müəyyənləşdirmək lazımdır. 'Beynəlxalq Şəffaflıq' bunu gizlədir. Bilirik ki, Estoniyada qeydiyyatdan keçiblər və Estoniya hakimiyyətinin nəzarəti altındadırlar. Bilmirəm, onları Estoniya maliyyələşdirir, yoxsa hansı dövlət, amma məncə, indi bu qrupun kimin tərəfindən maliyyələşdirildiyini müəyyənləşdirmək prinsipial əhəmiyyət daşıyır. Çünki maliyyəçini tapanda Gürcüstana qarşı düşmən kampaniyanın müəllifinin kim olduğunu anlayacağıq.

Bunun arxasında xüsusi xidmət orqanlarının dayandığına dair ehtimal var. Onlar məhz öz agentləri kimi gördükləri Mixeil Saakaşvilini həbsdən azad etmək istəyirlər və artıq 5 ildir ki, müxtəlif vasitələrlə buna çalışırlar.

Xatırlayırsınız ki, Polşa hökuməti hətta xüsusi tapşırıqla Mixeil Saakaşviliyə həkim göndərmişdi ki, corabında nələrisə çıxarsın. Onu saxladılar və Polşa hökuməti belə bir işə əl atdığı üçün tamamilə biabır oldu.

Biz Avropa İttifaqının ədliyyə nazirinə qarşı saxta demarşının da şahidi olduq. Həmin vaxt ədliyyə nazirinə birbaşa təzyiq edilirdi ki, Saakaşvili ölür, bunun baş verməsinə cəmi bir neçə gün qalıb və əgər Saakaşvilini Avropa İttifaqının nümayəndələrinə təhvil verməsək, o öləcək. Əgər ölsəydi, Gürcüstan hamı üçün, sözün əsl mənasında, vəba xəstəsi kimi olacaqdı.

Gördük ki, nəinki ona bir şey oldu, bundan sonra övladı dünyaya gəldi və məhkəmə proseslərini izləyən hər kəs onun çox sağlam göründüyünü görür. Bax, biz belə şeylərə əl atan insanlarla iş görürük. Buna görə də, əlbəttə, bu da diktatoru, öz agentlərini həbsxanadan azad etmək kampaniyasının bir hissəsidir. Bu tapşırıq indi Eka Qiqauriyə verilib. O, bütün bu məsələdə xarici maliyyəçilərin tapşırığını yerinə yetirən adi bir piyadadır. Buna görə də indi onun kimin tərəfindən maliyyələşdirildiyini müəyyənləşdirmək vacibdir.

Maliyyəçini tapacağıq, Gürcüstana qarşı düşmən kampaniyanın arxasında duran şəxsi və müəllifini müəyyənləşdirəcəyik”, - deyə Şalva Papuaşvili qeyd edib.

Məlumat üçün bildirək ki, Qeyri-hökumət təşkilatı “Beynəlxalq Şəffaflıq – Gürcüstan”ın məlumatına görə, ölkənin üçüncü prezidenti Mixeil Saakaşvilinin adı təşkilat tərəfindən hazırlanmış siyasi məhbuslar siyahısına daxil ediləcək. “Beynəlxalq Şəffaflıq – Gürcüstan”ın məlumatına görə, 2026-cı ilin iyul ayında Mixeil Saakaşvilinin vəkili təşkilata müraciət edib və araşdırma məqsədilə konkret işlərlə – “pencək işi”, sərhəd keçidi və “İmedi” teleşirkəti ilə bağlı materialları təqdim edib.

“Beynəlxalq Şəffaflıq – Gürcüstan”ın qənaətinə görə, “pencək işi” üzrə üçüncü prezident Mixeil Saakaşvili barəsində çıxarılmış hökm əsassız və ədalətsizdir, hazırda onun barəsində davam edən işlər üzrə hüquqi proses isə siyasi motivlidir.

Həmin məlumata məlumata əsasən, Mixeil Saakaşvili Avropa Şurası Parlament Assambleyasının 1900 saylı (2012) qətnaməsinə əsasən, siyasi məhbus üçün müəyyən edilmiş 5 meyardan 4-nə cavab verir.

Təşkilatın izahına görə, cinayət məsuliyyətinin və cəzanın müəyyən edilməsinin fundamental prinsiplərindən irəli gələrək, Mixeil Saakaşviliyə “pencək işi” üzrə 9 il müddətinə azadlıqdan məhrumetmə cəzasının verilməsi mahiyyət etibarilə ədalətsizdir və mütənasiblik prinsipinə ziddir.