“Mən hesab edirəm ki, hamı çoxdan başa düşməli idi ki, bu müharibə dayandırılmalıdır və o, dərhal dayandırılmalıdır. Bu, Azərbaycanın mövqeyidir. Bu, mənim şəxsi mövqeyimdir. Eyni zamanda, bu, torpaqları işğal olunmuş və sonradan həmin işğaldan azad edilmiş bir ölkənin lideri kimi mənim mövqeyimdir”.

Aktual.ge Azərbaycan KİV-ə istinadən xəbər verir ki, bunu Azərbaycanın Prezidenti İlham Əliyev Şuşada keçirilən IV Qlobal Media Forumunda deyib.

O, ukraynalıları heç vaxt işğalla barışmamağa çağırıb.

“Mən düşünmürəm ki, Ukrayna xalqının və ya Ukrayna rəhbərliyinin mənim məsləhətimə ehtiyacı var. Lakin bu gün də eyni tövsiyəni təkrarlayardım: heç vaxt işğalla barışmayın. Ukrayna da məhz bunu edir”, - deyə İlham Əliyev qeyd edib.

Onun sözlərinə görə, ona Ukrayna Prezidenti Volodimir Zelenskinin mövqeyi məlumdur.

“O, bunu dəfələrlə ictimai şəkildə bəyan edib. Bu ilin aprel ayında Azərbaycana səfəri zamanı biz bu məsələ ilə bağlı ətraflı fikir mübadiləsi apardıq. Onun mövqeyi təmas xətti boyunca dərhal atəşkəs elan edilməsidir. Bu təklifin hazırda nə dərəcədə aktual olduğunu deyə bilmərəm, lakin bildiyimə görə, o, bu mövqeyindən ictimai şəkildə geri çəkilməyib. Azərbaycanın mövqeyi dəyişməz olaraq qalır. Biz həmişə Ukraynanın ərazi bütövlüyünü, suverenliyini və beynəlxalq səviyyədə tanınmış sərhədlərinin toxunulmazlığını dəstəkləmişik və bundan sonra da dəstəkləyəcəyik. Heç bir ölkənin sərhədləri güc tətbiqi ilə və ya həmin ölkə xalqının razılığı olmadan dəyişdirilə bilməz. Bu məsələdə bizim mövqeyimiz ardıcıl və qətidir”, - söyləyib İlham Əliyev.

Onun sözlərinə görə, Ukrayna xalqına gəldikdə isə, Azərbaycan onlara hər zaman yardım etməyə hazırdır.

“Bu barədə çox danışmaq istəmirəm, çünki biz bunu ictimai nümayiş üçün etmirik. Bu, səmimi bir jestdir. Yardımı təkcə dövlət göstərmir. Burada həm sadə insanlar, həm də özəl şirkətlər iştirak edirlər. Bu, həmrəyliyin vahid nümunəsidir. Biz imkanlarımız daxilində ərazi bütövlüyü pozulmuş insanlara dəstək olmağa çalışırıq”, - Azərbaycan Prezidenti deyib.

Bununla yanaşı, o, Rusiya ilə Azərbaycan arasındakı münasibətlərə də toxunaraq bildirib ki, bu münasibətlər tam normallaşıb.

“Mən bir daha vurğulamaq istəyirəm ki, biz Rusiya ilə münasibətlərə böyük əhəmiyyət veririk. Həmçinin Rusiya Federasiyasının rəsmilərinin, o cümlədən Prezident Putinin ölkələrimiz arasında münasibətlərin müsbət inkişafı ilə bağlı bəyanatlarını gördük. Siz müəyyən çətinlikləri xatırlatdınız. Bəli, onların hamısını bilirik. Lakin əsas məsələ odur ki, həmin mərhələ artıq geridə qalıb. Deyərdim ki, münasibətlər tam normallaşıb. Müxtəlif səviyyələrdə təmaslar davam edir”, - deyə İlham Əliyev qeyd edib.