“Gürcüstanla müharibə dünya üçün indiki qədər rezonans doğurmamışdı. Müharibə 2–3 gün davam etdi və Rusiyaya, eləcə də rus xalqına qarşı bu gün gördüyümüz kampaniyanı yaratmaq üçün kifayət etmədi”.

Aktual.ge xəbər verir ki,  bunu "Gürcü Arzusu"nun Baş katibi, Tbilisi meri Kaxa Kaladze jurnalistlərə müsahibəsində söyləyib.  

Onun sözlərinə görə, 2008-ci il müharibəsi ilə bağlı bütün hadisələr “Vahid Milli Hərəkat”ın “xəyanətkar siyasəti”nin nəticəsi idi və bu gün müharibənin başlanmasına görə məsuliyyət Gürcüstan dövləti və ordusunun üzərinə qoyulur.

“Ümumilikdə, 2008-ci il müharibəsi ilə bağlı hər şey o dövrdə hakimiyyətin həyata keçirdiyi xəyanətkar siyasətin nəticəsi idi. Qanlı rejimin bütün addımları xaricdən diktə olunurdu. Təəssüf ki, ölkəyə qarşı sabotaj və düşmənçilik fəaliyyəti bu gün də davam edir. Biz hamımız birlikdə sülhü və ölkənin iqtisadi inkişafını qorumağa çalışmalıyıq”, - deyə Kaxa Kaladze qeyd edib.

Paytaxt meri həmçinin bəzi müxalifət partiyalarının 2008-ci il avqust müharibəsinin başlanğıc tarixi kimi 7 avqust 2008-ci ili qəbul etməsindən də danışıb.

“Əgər müharibənin anım gününün nə vaxt keçirildiyinə, həlak olanların xatirəsinin nə vaxt yad edildiyinə baxsaq, arxiv materiallarından da aydın görünər ki, bu tarix 8 avqust idi. Yəqin ki, tarixin niyə dəyişdirildiyini ‘Vahid Milli Hərəkat’dan soruşmaq lazımdır. Amma heç kim tarixi yenidən yaza bilməz.

Bunlar Gürcüstan dövlətinə qarşı xəyanətkar hərəkətlər idi və buna müvafiq cavab verilməlidir. Müharibənin başlanması Gürcüstan dövlətinin və ordusunun üzərinə atıldı və bu, birbaşa Talyavini hesabatında yazılıb. Sən bu qətnaməyə imza atanda, bu, xəyanətkar addımdır.

O zaman Gürcüstanla müharibə dünya üçün bu qədər rezonans doğurmamışdı. Müharibə 2–3 gün davam etdi və Rusiyaya, eləcə də rus xalqına qarşı bu gün gördüyümüz kampaniyanı yaratmaq üçün kifayət etmədi”, - deyə o söyləyib.